Kasaysayan sa Kalbinismong Pagtubos
Kung diin ang mga kabitoonan sa kalangitan
Wala pay huni o melodiya sa ilang pag-awit nga nasayran
Nagbarog ikaw ibabaw sa dili matukib nga bung-aw
Nga maoy nagbahin sa imong ginsakpan
nga dili malantaw o matunton sa
sa ilang mahuyang nga
paghanduraw.
Sa wala mo pa gihabol
ang panganod sa sihag nga kawanangan
Ug sa wala mo pa gipintal ang mga kutsita diha sa luna sa
kabukiran
Imo nang gibut-an ang padulngan sa pinili mong katawhan
Nga imong gimugna alang sa imong kahimayaan.
Nan, imo silang gipadayon sa bakanan sa pagkabuhi
Gibistahan sa sapot sa kahibalo ug gitugahan sa kupo sa
pagbati.
Gipasalo mo sa imong paghari,
Ug gihimong manunod sa walay kataposang kinabuhi.
Unsa ba g’yud ang bili sa bulingon nga lapok?
Nga ang mga putling kamot sa halungdong magkokolon
Maoy musuway sa paglilok?
Apan sa dihang nahulma ka na
gikan sa tibugol ug himi mo nga hitsura
Misupil ka ug nakigbatok sa persona
nga naghatag kanimog
gininhawa.
Gikan sa tugkaran sa kahayag ,
Sa ganghaan sa kangitngit milatas ka
Gitaak mo ang tulay sa kamatayon;
ug sa dautang buhat nakig-ambit ka!
Kinsa ba ang makagagahom nga imong giila?
Diba ang imong kaugalingon ang gihulip mo
ug mao ang imong gisimba?
Kay sa matag karon ug unya
Ang imong pagbuot maoy imong gituman:
Sukwahi sa langit, dinhi sa yuta;
sa impyerno imong
padulngan!
Apan taliwala, taliwala
sa imong pagkahisalaag ug pagkawala
Ang mga uwak sa lasang nga mi-awit sa imong pagkapukan
Ug ang mga serapin nga naligotgot sa imong kadautan
Nalumpong sa dili
matakos nga kahibulong
Ang Dios nga makakagahom nga ilang gialagaran
nihukas sa iyang
dungog alang sa iyang katawhan
Minaog gikan sa kinasampongan sa iyang gingharian
Nag-antos, gitamay, giluwaan,
gibiaybiay, gilatos ug gipurongpurongan
Para kini kang kinsa?
Sa mga tawo nga misupil ug nakigbatok kaniya.
Nan, ang mahugaw nga bisti nga giumol sa kanal sa
pagpakasala
Gilabhan sa hustisya, aron mabanwas sa sapa sa pagkawala
Ug ang tawo nga nagkaligo sa sala sa iyang dugo gimatarong
Sa grasya pinaagi sa pagtuo sa kinabuhing dayon mupadulong
Ug ang tawo nga nagkaligo sa sala sa iyang dugo gimatarong
Sa grasya pinaagi sa pagtuo sa kinabuhing dayon mupadulong
Comments
Post a Comment